夏日炎炎! 可惡的蚊又開始四出作惡!!

一到夏天, 吸你血的除了各大名牌換季新裝外! 就要數到蚊!

蚊除左咬完你 (其實佢係吉你) 吸你血令你痕之外, 對人類最大害處莫過於係傳染疾病! 據估計, 每年約有七億人被蚊傳染各種疾病, 每十七人中, 便有一人死於被蚊傳播的疾病, 近年大熱莫過於日本腦炎及登革熱! (註: 愛滋病是不會經過蚊而傳染的!)

蚊吸血係因為佢地需要蛋白質來進行繁殖, 當佢地吸血o既時候, 會注入唾液(口水), 內含蟻酸, 抗凝血劑吸成份不明的蛋白質, 與此同時, 身體會釋出一種稱為組織胺的蛋白質來對抗由蚊所帶黎o既外來物質, 皮膚紅腫及痕, 主要係對蚊唾液的過敏反應!

蚊的繁殖主要o係積水或水溝入面, 所以清除屋內積水, 會係減少蚊害o既一個有用方法!

有人話, 血臭會比較容易俾蚊咬, 血! 只會腥! 唔會臭! 都唔會香!

前 排o係明珠台動物之最節目入面提到, 吸引蚊黎咬你好主要係因為汗水! 夏日炎炎, 當你經過一日辛勞, 返到屋企滿身大汗同埋露出一對俾對鞋包住左半日臭哂o既腳o既時候, 就係最吸引蚊黎咬你o既時候! 所以放工後, 沖返個靚涼, 減少身體上的汗臭亦係防蚊o既唔錯o既方法!!

除左汗水! 吸引蚊o既仲有二氧化碳! 二氧化碳排放量多的人, 例如肥人及肺活量大的人, 還有孕婦因為新陳代謝較活躍, 都會比較 "野蚊" !

另外, 由於蚊唔太鍾意o係強光或者無光o既狀態下吸血, 所以弱光環境亦都令你俾蚊叮o既機會增加, 深色衫褲因為反射光線較少, 造成弱光環境, 所以夏天宜穿淺色衣服!

還有含花香味的香水, 化粧品, 髮膠等用品都會增加你被蚊叮的機會!

下次俾蚊咬完! 當你狠狠地將佢打扁之後, 你絕對可以大大聲講一句! "死八婆! 吸我血丫拿!! "

因為! 只有雌蚊先會吸血!

關於蚊的少少資訊：

大部份蚊身體小於 15mm

體重約 2~2.5mg

飛行速度約 1.5~2.5 公里

單次飛行大約可飛四分半鐘

飛行時翅膀每秒大約震動約六百次! (嘩! )